علمك يابلدى

علمك يابلدى

فى السما بيرفرف...

مبقاش مخنوق

مبقاش متكتف...

ولادك فى ايدك

حاجه تشرف...

حبك لحن

وقلبى بيعزف...

علمك يابلدى

على الوشوش مرسوم...

نسرك كان محبوس

مكسور مهموم...

دلوقت النسر طاير

وصوته مش مكتوم...

عرفتى يامصر

مين الظالم والمظلوم...

علمك يابلدى

فى الحوارى والشوارع...

منحوت فى القلوب

فى النصر والمواجع...

مفيش من النهارده

فى حبك موانع...

ده العشق فيكى

له الف دافع...

علمك يابلدى

فى السما بيرفرف...

مبقاش مخنوق

مبقاش متكتف...

الف حاجز

كان بينى وبينك

ياحبيبتى الف حاجز...

لكن عشقى فيكى

شئ حقيقى ومش جايز...

مهما كلابك طلعوا عليا

انا مش خايف ولا عاجز...

ده اللى يحبك

يكسر عشانك كل الحواجز...

فديت ولادك

من رصاص كلابك السعرانه...

حميتك يا مصر

ده انتى فى رقبتى امانه...

انا من خيرك

ومفيش غيرك حنين معانا...

مش مهم موتى

المهم تعيشى دائما جوانا...

قصيده هى..... الى روح الشهيده سالى زهران

هى الشمس اللى غابت

وغابت معاها الفرحه...

هى صوت كل مصرى

نط اسوار الدنيا الجارحه...

هى اللى عاشت وماتت

عشان تشوف الذل بيتنحى...

هى العروسه اللى راحت

وكفنها الابيض كان الطرحه...

الحلم عاش مامتش

وح نبدا تانى من اول صفحه...

شهيد خمسه وعشرين

مش مهم اسمى
مش مهم انا مين...
انا شاب من وسط
شباب ملاين...
عمرى ميه سنه
مع انى ماكملتش العشرين...
حلمت زى الناس بالحريه
لكل مصرى ومصريه...
قولنا خبز مساواه
عداله اجتماعيه...
وقفنا بكل فخر
نهتف نقول سلميه...
فهمونى بجد
هو فين بقى الغلط...
عشان ننضرب بالنار
ونتحتف بالزلط...
ده احنا صوت الشعب
مش شويا حراميه ولبط...
ايه يعنى لما اموت
واحمى ترابك يابلد...
سايبك ولا عايز منك
لا جاه ولا مال ولا ولد...
افتكرينى بس مع كل نصر
مع كل شاب بيتولد...
مع السلامه يا مصر
واشوف وشك بخير...
خلى بالك من ولادك
دول اللى بيحبوكى بضمير...
اوعى تلبسي اسود
البسي توب ابيض حرير...
مش مهم اسمى
مش مهم انا مين...
انا شاب من وسط
شباب ملاين...
انا اللى ليا الشرف
اكون شهيد خمسه وعشرين...

فى حب البلد دى

باقين الى اخر قطره فى دمائنا

مش حانسيبك يامصر